सिन्धुली । जिल्लाको फिक्कल गाउँपालिका वडा नं ५ लाई ‘बालमैत्री’ वडा घोषणा गरिएको छ ।

स्थानीय शासन कार्यविधि २०६८ बमोजिम ३० वटा, बालमैत्री स्थानीय शासन संक्षिप्त पुस्तिकाले थप गरेको १२ वटा र गाउँपालिकाले निर्धारण गरेको बालबालिकासम्बन्धी ९ वटा सुचांक पूरा गरेकाले बुधबार बालमैत्री वडा घोषणा भएको हो ।
बालमैत्री स्थानीय शासन कार्यान्वयन निर्देशिका २०७८ ले निर्दिष्ट गरेका तहगत खुड्किला, मापदण्ड र ५१ वटा सूचक पूरा गरेकाले जिल्लाका ७९ वडामध्येमा फिक्कलको वडा नं ५ तेस्रो भएको हो ।

यसअघि तीनपाटन गाउँपालिकाको क्रमश वडा नं १० र ५ लाई बालमैत्री स्थानीय शासन वडा घोषणा गरिएको थियो । बालबालिकाको बचाउ, संरक्षण, विकास, अर्थपूर्ण सहभागिता, अधिकारलाई स्थानीय तहको नीति, संरचना, प्रणाली र कार्यप्रक्रिया व्यवहारमा संस्थागत गरेकाले बालमैत्री वडा घोषणा भएको फिक्कल गाउँपालिकाका उपाध्यक्ष राजु बरालले जनाए ।

बालमैत्री वडा घोषणा भएको सुखद् दिन भनेर विद्यालयहरुका बालबालिकाले प्लेकार्डसहित कार्यक्रममा सहभागिता जनाएका थिए । वडामा हुने हरेक गतिविधिमा बालबालिकाहरुको अर्थपूर्ण सहभागिताको सुनिश्चितता गर्न र अन्य वडाहरुलाई समेत प्रेरणा मिलोस् भनेर सोल्पाको डाँडाबाट पञ्चेबाजाले गुञ्जयमान बनाई घोषणा गरिएको वडाध्यक्ष बैकुण्ठलाल पहाडीले बताए ।जिल्ला समन्वय समिति र गाउँपालिकाबाट सूचांकसहित सिफारिस भएपछि तेस्रो बालमैत्री वडा भएको वडाध्यक्ष पहाडीले जानकारी दिए ।

त्यसैगरी कार्यक्रममा जिल्ला समन्वय समिति प्रमुख कारसाङ लामाले बालबालिकालाई सुनौं र बाल सरोकारका निर्णय प्रक्रियामा अर्थपूर्ण सहभागिताको सुनिश्चितताको लागि हस्ताक्षर गरेका थिए ।