हामी आयौं, एउटा तृष्णा लिएर!  सञ्चारको सहज र सुलभ माध्यम अनलाइन पोर्टल मार्फत हामी तपाईँहरू माझ आएका छौ । हजारौंको संख्यामा रहेका नेपाली अनलाइनहरुको माझमा हामी पनि आएका छौँ । अहिले अनलाईन पोर्टलको थालनी नौलो होइन । नौलो त हामीले के गर्दछौं भन्ने हो । हाम्रो अबको यात्रा कुन दिशा तर्फ केन्द्रित हुन्छ भन्ने प्रश्न महत्वपूर्ण हो ।

नेपाली जनता आफैले गणतन्त्र घोषणा गरेको गौरवपूर्ण र ऐतिहासिक दिन पनि हो, आज । २०६५ जेठ १५ गते आजकै दिन २४७ वर्षदेखिको राजतन्त्रात्मक शासन व्यवस्थाको अन्त्य गरी नेपालमा गणतन्त्र स्थापना भएको थियो। यस गौरवपूर्ण र ऐतिहासिक दिनलाई साक्षी राखेर नै हामीले माईशिर मिडीया प्रा.लि. मार्फत डिजिटल अनलाइन समाचार पोर्टल माईशिर डटकम लाई औपचारिक रुपमा सुरुवात गरेका छौं ।

पत्रकारिता क्षेत्र गणतन्त्रको एउटा महत्वपुर्ण स्तम्भ पनि हो । गणतन्त्रमा मात्र पत्रकारिता सम्भव हुन्छ । जब गणतन्त्र खतरामा पर्छ, तब पत्रकारिता पेशा संकटमा पर्छ । त्यसैले हामी जहिलेपनि प्रेस स्वतन्त्रता र लोकतन्त्रमा विश्वास गर्दछौं र यही मान्यताका साथ पत्रकारितालाई अगाडी बढाउने छौं । ‘समृद्ध नेपाल सुखी नेपाली’ निर्माणमा सञ्चारको क्षेत्रवाट सहयोग गर्ने हाम्रो चाहना हो ।गणतन्त्रको संस्थागत विकासले आम जनताको जीवनमा परिवर्तन ल्याउनु पर्छ । हामी यी भुईमान्छेहरूको सफलताको कथा तपाईँहरूसँग बाड्न चाहन्छौं, जसको जीवन साँच्चै परिवर्तन भएको होस् ।

संचार क्षेत्रमा रहेर लामो समय कलम चलाएको हाम्रो अनुभवले भन्छ, अहिले पनि पत्रकारितामा गर्नुपर्ने काम धेरै छन् ।सुशासन, आर्थिक विकास र समृद्धिका समाचार आउन बाँकी नै छन् । अर्थतन्त्रमा सम्भावनाको ढोका खोल्न ढिला भइसकेको छ । तर, पनि यी ढोकाहरू चाहेर पनि लामो समय बन्द गर्न नसकिने अवस्थामा हामी छौं ।

सञ्चारमाध्यम समाजको दर्पण भनिएपनि आजको सञ्चारमाध्यमले त्यतिमात्रै भएर पुग्दैन भन्ने हाम्रो ठम्याइ छ। आजको सञ्चारमाध्यमले सूचना, विचार, छलफल र चिन्तन आदिका माध्यमबाट मान्छेभित्रको मान्छेलाई जगाउन सक्नुपर्छ। सिंगो समाज प्रगतितर्फ पाइला चाल्न प्रेरित होस्– एउटा नैतिक परिधिमा रहेर भन्ने आशयका साथ माईशिरले अहिलेको समाजमा देखिएको सूचना जानकारी र सत्यप्रतिको भोक मेटाउन अथक प्रयास गर्नेछ। समग्रमा भन्दा हामीले नीति निर्माणको क्षेत्रमा पैरवी गर्नेछौ । निजी क्षेत्रलाई काम गर्न उत्साहित बनाउनेछौं, आम जनताको अनुभव बाँड्नेछौं । सञ्चार माध्यमबाट हामीले गर्न सक्ने मोटामोटी काम यी नै हुन् भन्ने हामीलाई लाग्छ । पूर्वाग्रही नभैकन सकारात्मक सोच राखेर हामीले हाम्रो यात्रा अगाडि बढाउनेछौं ।

कुनै पनि संस्था जन्मनु ठूलो कुरा होइन । ठूलो कुरा त त्यसले आफ्नो यात्रामा कति प्रभाव पार्न सक्छ भन्ने हो । हाम्रा अभिभावकहरूले मन खोलेर हाम्रो यात्रामा साथ दिनुहुनेछ भन्ने हामीलाई छ, हाम्रो उत्साहमा ऊर्जा थप्नु हुनेछ । यस घडीमा विज्ञ पाठक, सहयोगी हातहरू र मार्गदर्शन गर्ने अग्रज तथा अभिभावहरूबाट सधैँ सहयोग पाउनेछौं भन्ने आशा र विश्वास लिएका छौं । तपाईहरूकै कारण हामी हाम्रो उद्देश्यको महामार्गमा यात्रा गर्न पाउनेछौं ।

हामी ढिलो नै सही, सत्य हुनेछौं । हतारको साहित्य भनिएपनि पत्रकारितामा गल्ति अक्षम्य छ । अनलाइन पत्रकारिता झनै संवेदनशिल बिधा हो । अनलाइनमा राखिएको सामाग्री निमेषभरमै विश्वभर पुग्दछ । यो आफैंमा सबै माध्यम होः पढिने, हेरिने र सुनिने माध्यम । हामी यो अवसरको सदुपयोग गर्नेछौं । हामी पठनीय सामाग्री लिएर आउनेछौं। हाम्रो उपस्थिति केबल पोर्टल को बाढी बिच मिसिन आएको एउटा ::-खहरे मात्र हुने छैन । सूचना र सञ्चारको भरपर्दो माध्यम हुनेछ भन्ने विश्वास दिलाउन चाहन्छौ। यही हाम्रो तृष्णा पनि!

                                                            सत्य – तपाईंले जान्न चाहेको!!

                                                                                                   -प्रकाशक/ सम्पादक