ग्वाल्टार । सिन्धुलीको गोलन्जोर गाउँपालिका का विद्यार्थीलाई  न्यानो कपडा  तथा  शैक्षिक सामाग्री  वितरण गरिएको छ ।

ब्याक टु लाइफ ई भी जर्मनीको आर्थिक सहयोग र सिएसडिएस सिन्धुलीको साझेदारीमा गोलन्जोर गाउँपालिका वार्ड नम्बर ४ आरुबोटे स्थित श्री प्राथमिक विद्यालय ट्वाङट्वाङेमा र गोलन्जोर गाउँपालिका वार्ड नम्बर ३ मुर्किबेसीमा रहेको कुशेश्वरी प्राथमिक विद्यालयमा अध्ययनरत ५८  बालबालिकाहरूलाई पालिका अध्यक्ष र सम्बन्धित वडा अध्यक्षको उपस्थितिमा न्यानो कपडा ज्याकेट र टोपी तथा  शैक्षिक सामाग्री (कापी, कलम आदि)  वितरण गरिएको छ ।

कार्यक्रममा बोल्दै ब्याक टू लाईफका डिकेन्द्र ढकालले शिक्षाको लागि आवश्यक आधारभूत कुराहरू र त्यसले बालबालिकाको सिकाईमा पार्ने महत्त्वपूर्ण भूमिकाको बारे आफ्ना भनाई राख्दै ब्याक टू लाईफले हाल गोलन्जोर गाउँ पालिकामा सञ्चालन गरिरहेको र निकट भविष्यमा सञ्चालन हुने विभिन्न आयोजनाको बारेमा पनि जानकारी दिएका थिए ।

कार्यक्रममा आफ्ना भनाई राख्दै गाउँपालिकाका अध्यक्ष शंकर राज बरालले ब्याक टु लाईफले यश गोलन्जोर गाउँपालिकालाई कार्यक्षेत्र बनाई सञ्चालन गरिरहेको खानेपानी योजना पालिका स्तरीय अस्पताल, स्वास्थ्य चौकी र विद्यालय भवन निर्माण गर्न लागिएकोमा सम्पूर्ण गोलन्जोर बासी समुदाय तथा आफ्नो व्यक्तिगत तर्फबाट दातृ निकाय ब्याक टू लाईफ तथा साझेदारी संस्था सिएसडीएस लाई धन्यवाद दिए ।

त्यस्तै वार्ड नम्बर ३ का अध्यक्ष कृष्ण प्रसाद पोख्रेलले ब्याक टू लाईफले गरिरहेका सम्पूर्ण कामबाट यस गाउँपालिकाको स्वास्थ्य शिक्षा र खानेपानी मा लागि धेरै नै ठुलो सहयोग हुने र हामी सम्पूर्ण पालिकावासीले आ आफ्नो क्षेत्रबाट निर्माण गरिएका संरचनाहरूको उचित संरक्षण र आवश्यक व्यवस्थापन तथा विद्यालयहरूमा बालबालिकालाई नियमित विद्यालय उपस्थिति गराउन सम्पूर्ण सरोकारवाला र अभिभावकहरू एकजुट भएर लाग्नुपर्ने बताए ।

निर्माण भइरहेको दुवै (प्राथमिक विद्यालय ट्वाङट्वाङे र मुर्किबेसीमा रहेको कुशेश्वरी प्राथमिक विद्यालयमा) ब्याक टु लाइफ ई भी जर्मनीकै आर्थिक सहयोगमा ४ कोठे पक्की शैक्षिक भवन निर्माण भइरहेको छ। आगामी शैक्षिक सत्रदेखि नयाँ  भवनबाट पठन पाठन सञ्चालन हुने लक्ष राखिएको स्थानीय साझेदार संस्था सिएसडिएसले जानकारी गराएको छ।