सिन्धुली । बागमती प्रदेशका आर्थिक मामिला तथा योजना मन्त्री कुन्दनराज काफ्लेले प्रदेश सरकारले जुन गतिमा काम गर्नुपर्थ्यो त्यो गतिमा काम गर्न नसकेको बताएका छन् ।

सिन्धुलीको तीनपाटन गाउँपालिका वडा नं. ८ बाहुनतिल्पुङ वडा कार्यालयको नवनिर्मित प्रशासकीय भवन उद्घाटन कार्यक्रमलाई सम्बोधन गर्दै बुधवार मन्त्री काफ्लेले सो कुरा बताएका हुन् ।

संघीय सरकारले  हामीलाई आफ्नो गतिमा काम गर्ने गरी कानुन नै बनाइदिएन। त्यसैले प्रदेशले जुन गतिमा काम गर्नुपर्थ्यो त्यो गर्न हामीले सकेनौँ । उनले भने, यो व्यवस्था जोगाउने हो भने सत्य कुराबाट जनतालाई बेखबर बनाउन मिल्दैन। आजको व्यवस्था जनताले जोगाउने व्यवस्था हो। जनतालाई झुट कुरा नेताले सुनाउने हो भने जनता भड्किन्छ र वितृष्णा बढेर आक्रोशमा रूपान्तरण हुन्छ।

महामन्त्री गगन थापाको किर्तिपुरको ल्यापटपवाला भाषणलाई खिल्ली उडाइयो। सपना नदेख्ने पनि नेता हुन्छ ? बिपीले प्रजातन्त्रको सपना देख्नुभयो, मेलम्चीको सपना किसुनजीले देखेको होइन ? उनले थपे ।

लोकतन्त्रमा प्रतिपक्षको आवाज बलियो हुनुपर्छ तर यति बेलाको प्रतिपक्षको आवाजले लोकतन्त्र बलियो बनाएन, जनतालाई भ्रमित बनायो। आज नेपाल जुन ठाउँमा आइपुगेको छ त्यसमा रामशरण महतको महतपूर्ण योगदान छ। उहाँको अर्थनीतिले देशको ढुकुटी बलियो बनाएको सत्य विरोध गरेर स्थापित हुँदैन।

साथै जौखोरीया- चकमकेको बाटो पक्की कर्ण मगरको कार्यकालमा सम्पन्न हुने कुरामा ढुक्क हुनुहोस्। बाग्मती प्रदेशले आर्थिक सहायता गरेर भूमिका निर्वाह गर्नेछ। उनले भने ।