सिन्धुली । जिल्लाको गोलन्जोर गाउँपालिकामा कार्यरत महिला स्वास्थ्य स्वयंसेविकाको लागि आधारभूत आँखा स्वास्थ्य शिक्षा तालिम सुरु भएको छ ।

भिजन फर दी वर्ल्ड, दिदी फाउन्डेसन  र सुनकोशी सामुदायिक अस्पतालको आयोजनामा भएको तालिममा गाउँपालिकामा कार्यरत २१ जना महिला स्वास्थ्य स्वसेविकाहरू सहभागी रहेका छन् ।

ग्रामीण तहमा रहेका आँखा सम्बन्धी समस्या भएका बिरामीहरूले समयमै आँखाको परीक्षण तथा उपचारका लागी प्रेरित गर्न तालिम आयोजना गरिएको दिदी फाउन्डेसनका को-फाउन्डर दीपक अछामी जानकारी दिए । उनले पुरानो उपचार शैली परिमार्जित गर्दै नयाँ उपचार पद्धति अपनाई अन्धोपन निवारण गर्नको लागि तालिमको आयोजना गरेको बताए ।

बिहीबार देखि खुर्कोटमा सुरु भएको तालिममा गाउँपालिका प्रत्येक वडाबाट ३ महिला स्वयंसेविकाहरू सहभागिता रहेको र खान बस्नको लागि सुनकोशी सामुदायिक अस्पतालले व्यवस्था गरेको रेडक्रस उपशाखा ग्वाल्टारका सभापति गौरव कार्कीले जानकारी दिए । साथै तालिम भोलीसम्म चल्ने पनि उनले बताए।

तालिम सिन्धुलीमा उपयुक्त भएको र प्रभावकारी पनि हुने भएकाले तालिम आयोजना गरेको भन्दै  गोलन्जोर गाउँपालिका उपाध्यक्ष ज्वाला प्रसाद न्यौपाने ( पुकार ) ले खुसी व्यक्त गरे । उक्त तालिमले स्वास्थ्य स्वयंसेविकाहरूको क्षमताको विकासको साथै समुदायमा सचेतना बिस्तारमा कोशे ढुङ्गा साबित भएको बताउँदै उनले दिदी फाउन्डेसन र सुनकोशी सामुदायिक अस्पताललाई धन्यवाद समेत दिए ।