सिन्धुली । यहाँ लगाइएको बर्खे धानको उत्पादन र उत्पादकत्व अनुमान तथा तथ्याङ्क लिन क्रप कटिङ (बाली कटानी) सुरु गरिएको छ ।

कृषि विकास कार्यालय सिन्धुलीले विभिन्न स्थानमा लगाइएको धानको उत्पादन अनुमान गर्न क्रप कटिङ सुरु गरेको हो । सिन्धुलीको दुधौली नगरपालिका, हरिहरपुरगढी गाउँपालिका तथा कमालामाई नगरपालिकामा क्रप कटिङ भइरहेको कार्यालय प्रमुख अरूण खनालले जानकारी दिए ।

धानको प्रत्येक ५ वर्गमिटर क्षेत्रफलमा क्रप कटिङ गरी उत्पादन अनुमान गरिने उनले बताए । खनालले भने, “यसवर्ष हामीले समग्र जिल्लामा गत वर्षको भन्दा बढी धान उत्पादन हुने अनुमान गरेका छौँ ।” एक कृषकको खेतमा ४ ठाउँबाट नमुना लिएर आंकडा निकाल्ने काम भइरहेको छ ।

उनले बाढी पहिरोको कारण अनुमानभन्दा केही उत्पादन घटे पनि धेरै घाटा भने नहुने अपेक्षा रहेको बताए । “प्रतिहेक्टर चार मेट्रिक टन अलि पुगेको छैन तर औसतमा प्रतिहेक्टर चार मेट्रिक टनकै हाराहीमा उत्पादन अनुमान गर्न सकिन्छ”, कार्यालय प्रमुख खनालले भने  “ हरिहरपुरगढी,सुनकोसी र गोलन्जोर गाउँपालिकामा बागमती, रोशी र सुनकोशीमा आएको बाढीका कारण  केही उत्पादन घटेको हामीले पाएका छौँ । सबै स्थानमा क्रप कटिङ गरी तथ्याङ्क लिएपछि उत्पादनबारे थाहा हुनेछ । ”

कार्यालयका अनुसार जिल्लामा यसवर्ष १३ हजार ४ सय ४५ हेक्टर क्षेत्रफलमा चैते तथा बर्खे धान लगाइएको छ । यहाँ सावित्री, रामधान, रन्जित, मकवानपुर-१, सावा मन्सुली, चैते-१/२, हर्दीनाथ ६, बहुगुणी १ र २, लगायत हाइब्रिड प्रजातिका धान लगाइएको छ ।

गत आर्थिक वर्ष १२ हजार ४ सय ४८ हेक्टर क्षेत्रफलमा धानखेती गरिएकामा ४२ हजार ८ सय ९९ मेट्रिक टन उत्पादन भएको थियो । तीनपाटन, फिक्कल,घ्याङलेख, गोलन्जोर र सुनकोशी गाउँपालिकाहरू आफैले क्रप कटिङ गरेर उत्पाद अनुमान गर्ने कृषि बिकास कार्यालयले जनाएको छ ।