सिन्धुली। असोज १० देखि १२ गतेसम्मको अविरल बर्षापछिको बाढीले बगाएको सिन्धुली–रामेछाप जोड्ने सुनकोशी नदीको बेलिब्रिज सञ्चालनमा आएको छ । भौतिक पूर्वाधार तथा यातायात मन्त्री देवेन्द्र दाहालले रिवन काटेर उद्घाटन गरेसँगै सञ्चालनमा आएको हो । आज (मंगलबार) देखि पुलमा गाडी गुड्न थालेका हुन् ।

सडक विभाग र नेपाली सेनाको सहयोगमा बेलिब्रिज पुनर्निर्माण भएको हो । सडक विभागले हेटौंडाबाट पाँच ट्रक बढी सामग्री सिन्धुली ल्याएर बीपी राजमार्गसँग सम्बन्ध स्थापित गरेको छ ।

आजबाट माइक्रो, सुमो, बस पुलमार्फत रामेछाप सिन्धुली आउजाउ गर्न सक्ने संघीय सडक सुपरीवेक्षण तथा अनुगमन कार्यालय काठमाडौंका शुभराज न्यौपानेले जानकारी दिए ।

असोज १०–१२ गतेको अबविरल वर्षापछिको बाढीले  बीपी राजमार्गसहितका सडकमा क्षति पुर्‍याएको थियो । रोशी खोलाले बगाएको बीपी राजमार्ग अस्थायी रुपमा दशैँअघि सुरु भए पनि रामेछाप र सिन्धुली जोड्ने बेलिब्रिज नहुँदा घुमेर हिँड्नुपर्ने बाध्यता थियो ।