सिन्धुली । अविरल वर्षाका कारण बाढी पहिरोले अवरुद्ध मध्यपहाडी लोकमार्ग अन्तर्गत खुर्कोट-घुर्मी खण्ड बनाउन सुरु गरिएको छ ।

शुक्रवारदेखि परेको अविरल वर्षाका कारण मध्यपहाडी लोकमार्ग अन्तर्गत गोलन्जोर गाउँपालिका-६ हैबार अक्कर भीर, हैबारबेंसी, बलेली,  कुखुरे टार, काली आँप र कुँडुले, मुर्कीबेसी, फिक्कल गाउँपालिकाको सुन्दामबेसी,नवलपुर, निगुरेखोला, पञ्चकन्या र थोल्मेघाट लगायत  विभिन्न दर्जन बढी स्थानमा पहिरो खस्दा राजमार्ग अवरोध भएको थियो ।

ओखलढुङ्गा, सोलुखुम्बु,खोटाङ, भोजपुर  र उदयपुरको राजधानी काठमाडौँ सँग जोडिने  मुख्य मार्गको रूपमा रहेको खुर्कोट-घुर्मी खण्ड पूर्ण रूपमा अवरुद्ध बनेपछि आज बेलुकीबाट बनाउन सुरुवात गरिएको एमाले नेता प्रदीप कटुवालले जानकारी दिए ।

उनले माईशिर डटकम सँग भने, ‘ हामी लोकमार्गको खुर्कोट तर्फबाट एक्स्काभेटर लगाएर बनाउन थालेका छौँ ।  बाटो बाढी र पहिरोले धेरै न पुरेको बगाएको छ । त्यसैले एक /दुई दिन भित्र एकतर्फी भए पनि सञ्चालनमा ल्याउने गरी विभिन्न निकायहरूसँग समन्वय गरेर लागेका छौँ ।’ चार्ड पर्व पनि आइसक्यो यो धेरै जिल्लाका नागरिकहरूको लाइफलाइनको रूपमा रहेको छ । त्यसैले हामीले जति सक्दो छिटो सञ्चालनमा ल्याउनु पर्छ नेता कटुवालले बताए ।

त्यसै गरी सिन्धुलीको फिक्कल गाउँपालिकाले मध्यपहाडी राजमार्ग अन्तर्गत खाङ्साङ- घुर्मी खण्डको बाढी पहिरोले अवरुद्ध सडक पन्छाउन सुरु गरेको छ ।गाउँपालिकाको जेसीबीले घुर्मीतर्फबाट सडक बनाउँदै खुर्कोटतर्फ आउने गाउँपालिका अध्यक्ष पार्वती सुनुवारले जानकारी दिइन्।