सिन्धुली । बाढीको कारण अवरुद्ध हुन पुगेको  बिपी राजमार्गको नेपालथोक–भकुण्डे सडक खण्डको नेपालथोक खण्डमा सवारी साधन सञ्चालनको लागि सडक डिभिजन कार्यालय खुर्कोटले प्रक्रिया अघि बढाएको छ ।

नेपालथोक खण्डमा करिब  सय मिटर सडक रोशी खोलाले बगाएको छ । सो स्थानमा रोशीलाई ड्राईभड गरेर सडक खुलाउने प्रक्रिया अघि बढाइएको सडक डिभिजन कार्यालय खुर्कोटका प्रमुख (सि.डि.ई.) पारसमणि हमालले बताए ।

उनले माईशिरसँग भने,‘हामी छिटो भन्दा छिटो सडक सुचारु गराउने कार्यमा लागेका छौ, आजबाट काम अघि बढ्छ, रोशीलाई ड्राइभर्ट गरेर यातायात सञ्चालन गराउने काम हुनेछ । डिभिजनले सडक निर्माणको लागि आवश्यक मेसिन र जनशक्ति समेत सो खण्डमा परिचालन गरिएको बताएको छ ।

सो सडक खण्ड सञ्चालनमा आए पनि काभ्रेको कालोढुंगो नार्के, चौकी डाँडा लगायतको स्थानमा भने अवरुद्ध सडक सुचारु गर्न अझै केही दिन लाग्ने सडक विभागले जनाएको छ ।