सिन्धुली । जुनारको राजधानी मानिएको सिन्धुलीको जुनारमा सुँडे मोथ पुतलीको प्रकोप देखिएको छ । गतवर्ष केहि मात्रामा देखिएको यो पुतली यो वर्ष अत्यधिक बढेको छ । सुँडे पुतलीका कारण जुनारमा क्षति बढेपछि वागमती प्रदेशसभा सदस्य सुष्पा भुजेल निरिक्षणको लागि जुनार बगैंचा पुगेकी छिन् ।

पुतलीको प्रकोपका बारेमा अनुगमन गर्न सोमबार राती सांसद भुजेल  प्राविधिक सहितको टोली जुनार क्षेत्रमा पुगेका थिए । सुँडे पुतलीको कुनै औषधी नभएको र रातको समयमा फलमा आएर बस्ने, फलको रस चुस्ने र फल नै झर्ने भएकाले जुनार किसानहरु चिन्तित बनेका छन । जुनार बगैंचामा रातको समयमा बढी क्षति गर्ने भएकाले निगरानी गर्नु परेको जुनार सुपरजोनका प्रमुख याम कुमार श्रेष्ठले बताए ।

गत वर्षहरुमा देखिएकै ठाउँका बगैंचामा पुतलीको प्रकोप देखिएको उनले बताए । विशेष गरि गोलञ्जोरका गाउँपालिकाको खनियाँखर्क, नयाँखर्क, तिनकन्या, भदौरे, कुभिण्डे, वेखटाँडी, रानीखोला, ओख्ले, किराँते, सान्ने लगाएतका स्थान र कमलामाई नगरपालिकाको चपौलीमा यो पुतलीको प्रकोप बढेको छ ।

उनका अनुसार कतिपय बोटहरु फल झरेर खाली भईसकेका छन । यसको निराकरणका लागि लिसोको पासोमा पार्ने, रातमा समाउने र मार्ने अभियान सुरु गरिएको छ । राती वत्ति बालेपछि पुतली नभाग्ने भएकाले समाउन सकिने श्रेष्ठले जानकारी दिए ।

यसैगरी जिल्ला समन्वय समिति सिन्धुलीका प्रमुख कार्साङ लामा, उपप्रमुख शान्ता कार्की, गोलञ्जोर गाउँपालिका वडा नं ५ का वडा अध्यक्ष गोविन्द लुंगेली, कृषि विकास कार्यालयका प्रमुख र प्रधानमन्त्री कृषि आधुनिकीकरण परियोजनाका प्रमुख याम कुमार श्रेष्ठ, प्राविधिक सहितको टोली सुपरजोन अनुगमनमा पुगेका थिए।