सिन्धुली । विश्व आत्महत्या रोकथाम दिवसको अबसरमा सिन्धुलीमा अन्तरक्रिया कार्यक्रमको आयोजना गरिएको छ । जनस्वास्थ्य कार्यालय सिन्धुलीको आयोजनामा आत्महत्या रोकथाम तथा न्युनिकरण सम्बन्धी सञ्चारकर्मी र सरोकारवालाहरुसँग अन्तरक्रिया कार्यक्रम गरेको थियो ।

कार्यक्रममा सिन्धुली अस्पताल सिन्धुलीकी मेडिकल अधिकृत अपर्ना कार्कीले आत्महत्या भनेको के हो, यसका लक्षण, यसको अवस्था, कानुनी प्रावधान, रोकथामका उपायहरु र समस्या तथा चुनौतीको बारेमा प्रस्तुतीकरण दिएकी थिइन् ।

सिन्धुली अस्पताल, एकद्धार संकट व्यवस्थापन केन्द्र (ओसिएमसि) की घटना व्यवस्थापक सुनिता शर्माले ओसिएमसि स्थापना भएदेखि हासम्म २ हजार १ सय ८१ जनाले सेवा लिएको बताइन् । ती मध्ये ओसिएमसिमा काउन्शिलिश्रका लागी फलोअपमा आईरहेका सेवाग्राहीको संख्या १ हजार ४ सय १० रहेको छ । मानसिक तथा मनोसामाजिक समस्या भई उपचार पाएका तथा औषधी सेवन गरिरहेका सेवाग्राहीको संख्या १ सय ४५ जना रहेको र १ सय ४५ जना मध्ये फलोअपमा रहेको सेवाग्राहीको संख्या १ सय २३ रहेको उनले जानकारी दिइन् ।

आत्महत्या वा आत्महत्याको सोच आएका निशुल्क टोल फ्रि नम्बर ११६६ मा सम्पर्क गरि परामर्श लिन सकिने छ । कुनै पनि व्यक्तिमा आत्महत्याको सोच आए, हाम्रो वरिपरि भएको कोही व्यक्तिले त्यस्तो व्यवहार देखाए, आत्महत्याको प्रयास गर्दागर्दैको अवस्थाबाट उनीहरूलाई बचाउने उद्देश्यले सरकारले उक्त हेल्पलाइन सुरु गरेको हो । बागमती प्रदेशमा २०८० / ८१ मा ९ सय ७७ जनाले आत्महत्या गरेका छन् ।