सिन्धुली । सिन्धुलीको जुनार बगैँचाहरूमा चुसाहा पुतली किरा (सुँडे पुतली) को प्रकोप सुरु भएपछि किसान चिन्तित बनेका छन् ।

सिन्धुलीका केही जुनार बगैँचामा गत वर्ष झैँ यस वर्ष पनि फल छेड्ने र चुस्ने मोथ –  सुँडे पुतली देखा पर्न थालेका छन् । जिल्लाको गोलन्जोर गाउँपालिका-४ किराते,  गोलन्जोर गाउँपालिका -६ नाकाजोली‚धुसुनी, गाउँपालिका -५ रतनचुरा डाँडा र कमलामाई नगरपालिका ३ चपौलीका जुनार बगैँचामा सुँडे पुतली देखा पर्न थालेका हुन् ।

सिन्धुलीमा गत सालको तुलनामा यो वर्ष  छिट्टै सुँडे पुतली  देखिएको गोलन्जोर गाउँपालिका – ६ नाकाजोलीका जुनार कृषक ललित मगर बताउँछन् । गत वर्ष झैँ सुँडे किराले फल नै झारिदिने भएकाले जुनारमा धेरै नोक्सानी गर्न सक्ने मगरको भनाइ रहेको छ ।

सिन्धुलीमा गत वर्ष  जुनार बगैँचाहरूमा ११ प्रतिशत देखि ४५ प्रतिशतसम्म फलको रस चुसेर नष्ट भएको र अनुमानित २ करोड ५८ लाख रुपैयाँ बराबरको क्षति गरेको जुनार उत्पादक कृषि सहकारी संघ सिन्धुलीका अध्यक्ष निर्मल कुमार रम्तेलले माईशिरलाई बताए ।

ठाउँ-ठाउँमा देखा परे पनि यसले अहिलेसम्म कुनै क्षति नगरेको  प्रधानमन्त्री कृषि आधुनिकीकरण परियोजना, परियोजना कार्यान्वयन इकाई सिन्धुलीका कृषि प्राविधिक जहान बहादुर कार्कीले जानकारी दिए ।

सुँडे पुतलीले साँझ ६-८  बजेसम्म फलको रस चुस्ने र बिहान पनि झिसमिसेमा आउँछ, उज्यालो हुनासाथ भाग्ने भएकाले सुँडे पुतलीलाई नियन्त्रणमा लिन नसकिएको कृषि प्राविधिक कार्की बताउँछन् । सुँडे पुतलीको प्रकोप गत वर्ष भन्दा पहिले नै फैलिन सुरु गरेको छ । कार्की भन्छन्‚ ‘यसको नियन्त्रणको लागि हामीले विभिन्न सञ्चारमाध्यमहरूबाट सूचना बजाउने र किसानले बगैँचामा धुवाँ लगाउने बाहेक कुनै उपाय छैन ।‚ जुनारमा गुलियो रस फस्न थालेपछि मात्र यसले क्षति गर्ने भएकाले अहिले खासै डराउनु पर्ने अवस्था नरहेको उनको भनाई छ ।

जुनार सुपरजोनको कार्य क्षेत्रमा गोलन्जोर गाउँपालिकाको वडा नम्बर १ देखि ६ नम्बरसम्म, कमलामाई नगरपालिकाको वडा नम्बर ३, सुनकोशी र तीनपाटन गाउँपालिकाको वडा नम्बर ७ पर्दछ । सिन्धुलीका दुई हजार दुई सय ६२ जना किसान जुनार सुपर जोन परियोजनामा आबद्ध रहेको छन् ।