सिन्धुलीमाढी । सिन्धुलीमा पनि ‘मर्यादित सहकारी: समुन्नत समाज’ भन्ने नाराका साथ ६८औँ राष्ट्रिय सहकारी दिवसको मनाइएको छ ।

जिल्ला सहकारी संघ सिन्धुली, राष्ट्रिय सहकारी बैङ्क सिन्धुली र कमलामाई नगरपालिकाको आयोजना तथा जिल्ला बचत तथा ऋण सहकारी संस्था सिन्धुलीको संयोजनमा सिन्धुलीमाढीमा प्रभात फेरी सहित सिन्धुली अस्पतालमा रहेका २७ बिरामीहरूलाई फलफूल वितरण गरेर मनाइएको छ ।

कार्यक्रममा कमलामाई नगर प्रमुख उपेन्द्र कुमार पोखरेलले सहकारी चलाउने सञ्चालक समितिले सहकारीका सिद्धान्तलाई आत्मसात् गरेर सहकारी सञ्चालन गर्नुपर्ने बताए । उनले सहकारीहरूलाई अनुत्पादक क्षेत्रमा जथाभाबी लगानी नगर्न सचेत गराए । उनले भने, ‘सानो सानो व्यवसाय गरेका मानिसहरूले दुःख गरेर कमाएको रकम भोलिको भविष्यको लागि जम्मा बचत गरेका छन् । तर, संञ्चालकहरुले अनुत्पादक क्षेत्रहरूमा ऋण प्रवाह गर्दा धेरै सहकारीहरू समस्यामा छन् । त्यसैले आगामी दिनमा उत्पादनमा अथवा उत्पादन मुखी क्षेत्रमा ऋण कर्जा प्रवाह गर्नुहोला ।’  साथै नगर प्रमुख पोखरेलले सहकारीलाई व्यतीथीबाट बचाउन विधि, ऐन, नियम, कानुन र परिधिलाई बुझेर शेयर सदस्यलाई स्कुलिङ गर्न सहकारीका सञ्चालक आफै लाग्नुपर्ने बताए ।

नेपालमा सहकारी अभियानको औपचारिक थालनी वि.सं. २०१३ साल चैत २० गतेदेखि भएको मानिन्छ । सोही ऐतिहासिक दिनको स्मरण गर्दै प्रत्येक वर्ष चैत २० गतेलाई ‘राष्ट्रिय सहकारी दिवस’ का रूपमा मनाउने परम्परा रहिआएको छ ।