सिन्धुलीमाढी। सुदृढ गणतन्त्र र संविधानको रक्षाका लागि नेकपा (एमाले) सिन्धुलीले जिल्लामा जागरण सभा गरेको छ।

‘प्रतिगामी चलखेललाई परास्त गरौँ। लोकतान्त्रिक गणतन्त्रलाई सुदृढ गरौँ’ भन्ने मूल नाराका साथ सिन्धुलीको बुद्ध नगरबाट बाट र्‍याली सुरु गरी एमाले पार्टी कार्यालय, गैरी बजार हुँदै लोकतान्त्रिक चोकमा पुगेर जागरण सभा गरिएको थियो।

र्‍यालीमा गणतन्त्र जिन्दाबाद, प्रतिगमन मुर्दावाद, हिंसा, हत्या र लुटपाट मुर्दावाद, जन्मसिद्ध श्रेष्ठता अस्वीकार गरौँ, नेकपा (एमाले) जिन्दाबाद, दाश र रैती बन्न मञ्जुर छैन, हत्यारालाई कारबाही गर, शान्ति सुव्यवस्था कायम गर, सामाजिक अराजकता मुर्दावाद, जनताको बहुदलीय जनवाद जिन्दाबाद लगायतका नारा लगाइएको थियो।

कोणसभालाई एमाले सिन्धुलीका उपाध्यक्ष कर्ण घिसिङ, केन्द्रीय सदस्यहरू उमा कोइराला, बिषमलाल अधिकारी दनुवार, गणेश कुमार पहाडी र जिल्ला इन्चार्ज समेत रहेका मनोज जंग थापाले सम्बोधन गरेका थिए ।

सभामा नेकपा एमालेका केन्द्रीय सदस्य एवम् सिन्धुली जिल्ला इन्चार्ज मनोज जंग थापाले राजावादीले गरेको हर्कतबाट प्रष्ट भइसकेको बताए। उनले भने, ‘निजी घरमा आगजनी गर्दा रहेछन्, पत्रकारलाई जलाउँदा रहेछन्, सञ्चारमाध्यममा तोडफोड गर्दा रहेछन्, राजनीतिक दलका कार्यालयमा आगजनी र तोडफोड गर्दा रहेछन्, राजतन्त्रको चरित्र के हो भनेर उनीहरूले देखाइसकेका छन्।’ नेता थापाले गणतन्त्र आएपछि सिन्धुलीमा थुप्रै सकारात्मक परिवर्तन भएको बताउँदै यस व्यवस्थाप्रति निराश नहुन आग्रह गरेका छन्। समृद्ध नेपाल र सुखी नेपाली बनाउने अभियान जारी रहेको बताउँदै नेता थापाले भने ‘देश बन्दै छ।’

एमाले केन्द्रीय सदस्य एवम् पूर्व मन्त्री गणेश कुमार पहाडीले नेपाली जनताहरूले अब निरङ्कुशता नचाहने बताए। उनले जब जब नेकपा (एमाले) ले देशमा नेतृत्व गरी विकासको लहर ल्याउन खोज्छ तब तब देशमा यो वा त्यो बहानामा विकासको लहरलाई रोक्न असन्तुष्टि पैदा गराउने तत्त्वहरू सक्रिय हुने गरेको बताए। अहिले राजावादीहरूले यसो गरिरहेको उनको भनाइ छ। हत्या र हिंसाको पक्षमा उत्रिएका पूर्व राजा ज्ञानेन्द्र शाहलाई जेलमा पु¥याउँन राजनीतिक दल तथा गणतन्त्र पक्षधर शक्तिहरूले पुनः विचार गर्ने बेला आएको बताए । उनले राज्यका तर्फबाट राजा ज्ञानेन्द्रलाई प्रदान गरिने सेवा सुविधाको पनि कटौती गर्नुपर्ने धारणा राखेका थिए। नेकपा एमाले सधैँ लोकतान्त्रिक गणतन्त्रको पक्षमा दृढताका साथ संकल्पित भएर उभिने उनको भनाई थियो ।

एमाले सिन्धुलीका अध्यक्ष महेन्द्रदेव श्रेष्ठले जनताको ठुलो बलिदानी पूर्ण आन्दोलनबाट यो व्यवस्था ल्याइएको बताउँदै यसलाई कसैले त्यति सहजै फर्काउने सपना नदेख्न चेतावनी दिए।