सिन्धुली । त्रिभुवन विश्वविद्यालयबाट सम्बन्धन प्राप्त सिन्धुलीको सबैभन्दा ठुलो र  पुरानो सिन्धुली बहुमुखी क्याम्पसको स्वतन्त्र विद्यार्थी युनियन (स्ववियु) अध्यक्षको लागि तीन जनाले प्रतिस्पर्धा गर्दै छन् ।

सिन्धुली सदरमुकामको ढुंग्रेवासमा सञ्चालित सिन्धुली बहुमुखी क्याम्पसमा यही चैत्र ९ गते शनिवार स्ववियु निर्वाचन हुँदै छ । क्याम्पस स्ववियु अध्यक्षको लागि  नेकपा (एमाले) निकट अनेरास्ववियुका र माओवादी केन्द्र निकट अखिल क्रान्तिकारीले गठबन्धन गरेर अनेरास्ववियुका तुलसीराम भुजेललाई उम्मेदवार बनाएको छ । भने नेविसंघले कांग्रेस जिल्ला सभापतिका विश्वास पात्र मानिने समीर विक्रम थापालाई उम्मेदवार बनाएको छ । त्यसै गरी अखिल क्रान्तिकारीका विनोद कुमार कार्कीले संगठनले अनेरास्ववियुसंग गठबन्धन गरेर आफूलाई टिकट नदिएको भन्दै, बागी (स्वतन्त्र) उम्मेदवारी दिएका छन् ।

अनेरास्ववियु र अखिल क्रान्तिकारीको गठबन्धनबाट उम्मेदवार बनेका भुजेल विद्यार्थी र प्राध्यापकहरू माझ निकै लोकप्रिय रहेका छन् । उनी बहुमुखी क्याम्पसको निवर्तमान स्ववियु कोषाध्यक्ष पनि हुन् । गठबन्धनमा अखिल क्रान्तिकारीबाट सचिव विष्णु पाण्डे र  कोषाध्यक्ष विमला सिंजाली रहेका छन् ।

नेविसंघ समीर विक्रम थापाको नेतृत्वमा एकल चुनावमा होमिएको छ । बहुमुखी क्याम्पसमा क्रियाशील र लोकप्रिय विद्यार्थी नेताहरू कृष्ण लामिछाने, स्वस्तिका बख्रेल र राजीव थापा लगायतलाई पाखा लगाएर कांग्रेस सभापतिको आशीर्वादमा  टिकट हत्याएका थापाको प्यानलमा केशव घिमिरे सचिव र सजिना श्रेष्ठ कोषाध्यक्ष रहेकी छिन् ।

अध्यक्ष, सचिव, कोषाध्यक्ष र केही सदस्य प्रत्यक्ष तथा उपाध्यक्ष, सहसचिव लगायत केही सदस्य समानुपातिक निर्वाचन प्रणालीअनुसार निर्वाचित हुनेछन् ।

निर्वाचन निर्देशिकामा क्याम्पसमा रहेका विद्यार्थी सङ्ख्याका आधारमा स्ववियु कार्यसमिति निर्वाचित हुने व्यवस्था छ ।  १९  सदस्यीय स्ववियु कार्यसमिति रहनेछ । स्ववियु कार्यसमितिको कार्यकाल दुई वर्षको हुनेछ ।