सिन्धुली । माझी समुदायको विशेष पर्व लदी पूजाका अवसरमा सिन्धुलीको मरिण गाउँपालिकाले विदा दिने भएको छ । गाउँपालिकाले यहि फागुन १९ गते र २० गते दुई दिन विदा दिने निर्णय गरेको हो ।

नेपालको मध्यपहाडी, भित्री मधेश र तराईका जिल्लामा माझी समुदायको प्रमुख बसोबास छ  भने सिन्धुलीको मरिण, हरिहरपुरगढी, सुनकोशी, गोलन्जोर र फिक्कल गाउँपालिका तथा कमलामाई र दुधौली नगरपालिकामा माझी समुदायको बसोबास रहेको छ । सुनकोशी, बागमती मरिणखोला र कमला नदी तथा खोला आसपासमा माझी जातिको बसोबास छ ।

परम्परादेखि नदी, खोलामा निर्भर माझीको पुख्र्यौली पेसा माछा मार्ने र डुङ्गा चलाउने भए पनि यिनले हाल कृषि पेसालाई मुख्य पेसाका रूपमा लिँदै आएका छन् । छुट्टै इतिहास, भाषा, संस्कार, संस्कृति, पहिचान र विशेषता भएको यो जातिको बसोबास प्रायः नदी किनारमा रहेको छ ।

राष्ट्रिय जनगणना २०७८ को तथ्याङ्क अनुसार नेपालमा माझीको जनसङ्ख्या एक लाख ११ हजार ३ सय ५२ रहेकोमा सबैभन्दा बढी बागमती प्रदेशमा मात्र ४१ हजार ६७१ बसोबास गर्छन् ।

साथै, बागमती प्रदेश सरकारले लदी पर्व मनाउन फागुन २० माझी समुदायका लागि मात्र सार्वजनिक बिदा दिने निर्णय गरेको छ