२७ माघ २०८१, सिन्धुलीमाढी। सिन्धुलीमा राष्ट्रपति रनिङ शिल्ड तथा प्रथम जिल्ला स्तरीय खेलकुद महोत्सव हुने भएको छ ।

सिन्धुली जिल्ला खेलकुद विकास समितिले शविवार (आज) पत्रकार स्रम्मेलन गरेर आगामी फागुन ५ देखि १३ गतेसम्म सिन्धुलीमाढीमा राष्ट्रपति रनिङ शिल्ड तथा खेलकुद महोत्सव गर्ने बताएको छ ।

सिन्धुली जिल्ला खेलकुद विकास समितिले र जिल्ला समन्वय समिति सिन्धुलीको समन्वयमा खेलकुद महोत्सवमा जिल्लाका ९ वटै पालिकाका खेलाडीहरूले सहभागीता जनाउने सिन्धुली जिल्ला खेलकुद विकास समितिका अध्यक्ष वीरबहादुर थिङ तामाङले जानकारी दिए ।
सिन्धुली जिल्लामा रहेको खेलाडीहरुको पहिचान गर्न, नयाँ खेलाडीहरु उत्पादन गर्न र प्रदेश तथा राष्ट्रिय स्तरमा हुने प्रतियोगितामा जिल्लाको प्रतिनिधित्व गर्न सक्ने खेलाडीको खोज गर्न खेलकुद महोत्सव आयोजना गर्न लागिएको सिन्धुली जिल्ला खेलकुद विकास समितिका अध्यक्ष थिङले पत्रकार सम्मेलनमा बताए ।

त्यस्तै, प्रतियोगितामा राष्ट्रपति रनिङ शिल्डमा हुने खेलहरु कराते, एथ्लेटिक्स, भलिबल, फुटबल, कबड्डी, तेक्वान्दो, क्रिकेट, ब्याडमिन्टन, म्याराथन र बक्सिङ खेलहरुमा १ हजार ३ सय ४३ जना खेलाडीहरुले प्रतिस्पर्धा गर्ने महोत्सव आयोजक समितिका सदस्य दिपेन्द्रध्वज बस्नेतले जानकारी दिए ।