सिन्धुली । सरकारले सञ्चालन गरेको स्वास्थ्य बिमा कार्यक्रममा सिन्धुलीको  ३१ हजार ७२ परिवारका १ लाख २१ हजार दुई सय ४९ जना आबद्ध भएका छन् ।

उक्त तथ्याङ्क विसं २०७४ भदौ १ गतेदेखि स्वास्थ्य बिमा कार्यक्रम लागू भएयता हालसम्म सिन्धुलीमा ५९ हजार दुई सय २० पुरुष र ६२ हजार ११ महिला रहेको स्वास्थ्य बिमा बोर्ड सिन्धुलीको प्रमुख सुदिना दाहालले  जानकारी दिइन् ।

उनका अनुसार सबैभन्दा बढी कमलामाई नगरपालिकामा स्वास्थ्य बिमामा आबद्ध भएका छन् भने सबै भन्दा कम घ्याङ्लेख गाउँपालिकामा स्वास्थ्य बिमामा आबद्ध भएका छन् ।

कमलामाई नगरपालिकामा ३६ हजार छ सय ४९ बीमीत हुँदा घ्याङ्लेख गाउँपालिमा ३ हजार छ सय ५३ जना मात्र स्वास्थ्य बिमा कार्यक्रममा आबद्ध भएको प्रमुख दाहालले बताइन् ।

गोलन्जोर गाउँपालिकामा १० हजार पाँच सय ५८, दुधौली नगरपालिका २१ हजार चार सय ५०, तीनपाटन गाउँपालिकाका १६ हजार दुई सय ८२ र फिक्कलका ८ हजार पाँच सय ५८ जना स्वास्थ्य बीमा कार्यक्रममा आबद्ध भएका छन् । त्यसै गरी  मरिण गाउँपालिकाको १२ हजार तीन सय ८८, सुनकोशीको ८ हजार तीन सय ५८ र हरिहरपुरगढीको ४ हजार ४२ जना स्वास्थ्य बिमा कार्यक्रममा आबद्ध भएको प्रमुख दाहालले माईशिर डटकमलाई जनाकारी दिइन् ।

त्यस्तै ज्येष्ठ नागरिक ८ हजार दुई सय ८४, मधुमेहका ९ सय, एचआइभी सङ्क्रमित १ सय १९ र ८ जना छयारोगका बिरामी स्वास्थ्य बीमामा आबद्ध रहेका छन्।

कार्यालयमा बिमा दर्ताका लागि नयाँ आवेदन पनि आइरहेको स्वास्थ्य बिमा बोर्ड कार्यालयले जनाएको छ । सिन्धुलीमा स्वास्थ्य बिमा बोर्डले जिल्लाको सम्पूर्ण स्थानीय तहका वडामा सहजकर्तामार्फत प्रचारप्रसारसँगै बीमीतहरूको नाम दर्ता गराउँदै आएको छ । स्वास्थ्य बिमा गराएकाले जिल्लाको पाँच स्वास्थ्य संस्थाबाट स्वास्थ्य सेवा लिँदै आएका छन् ।

सिन्धुली अस्पताल, दुधौली नगर अस्पताल, लाम्पान्टार प्राथमिक स्वास्थ्य केन्द्र, बेलघारी आधारभूत अस्पताल र कपिलाकोट प्राथमिक स्वास्थ्य केन्द्रबाट स्वास्थ्य बिमा गरेकाले सेवा लिँदै आएका छन् ।