हेटौंडा । सिन्धुलीकी १४ वर्षीया किशोरी जेनिशा  क्यापछाकी मगर बागमती प्रदेश उद्योग भूमि तथा प्रसाशन मन्त्री बनेकी छिन् ।

गैर सरकारी संस्था जनजाति समाज विकास कार्यक्रम (जेएसडीपी)ले आज आयोजित कार्यक्रममा तीपाटन गाउँपालिका-२ भीमस्थानकी जेनिशा एकदिने मन्त्री बनेकी हुन् । माननीय मन्त्री सुकमाया तामाङले किशोरी जेनिशालाई  आफ्नो पद हस्तान्तरण गर्दै सिन्धुली जिल्लाको मात्र नभई समग्र बागमती प्रदेशका किशोर किशोरीहरुको समस्या समाधान गर्न र उनीहरूको वक्तित्व विकासका लागि काम गर्न सुझाव दिईन् ।

मन्त्री तामाङले नयाँ मन्त्री  जेनिशालाई मन्त्रालयबाट भए गरेका कामहरुको जानकारी गराईन् ।  नव नियुक्त मन्त्रीले बागमती प्रदेशमा वातावरण मैत्री उद्योग स्थापना गरेर देशमा बद्दैगएको बेरोजगारी समस्या समाधान गर्न काम गर्ने बताइन् । उनले अगाडि भनिन् सबै भन्दा पहिला बेरोजगारी समस्या समाधान गर्न र बढ्दो विदेश पलायन रोक्न काम गर्ने छु । उनले बागमती प्रदेशमा किशोर किशोरीको समस्या जटिल रहेको बताउँदै  यस क्षेत्रमा काम गर्न सबैको सहयोग जरुरी भएको बताइन् ।

कार्यक्रममा मन्त्रालयका सचिव राजेन्द्र कुमार केसीले  नव नियुक्त मन्त्री जेनिशालाई  मन्त्री बनेर पहिला के काम गर्नु हुन्छ भन्ने प्रश्न गरेका थिए ।   त्यसक्रममा मन्त्री जेनिशाले बेरोजगारी अन्त्य गर्न आफूले पहिला ठूला ठूला उद्योग स्थापना गर्ने प्रष्ट पारिन् ।