सिन्धुली ।  नगर स्तरीय अन्तर विद्यालय  क्रिकेट प्रतियोगितामा  भगवती अंङ्ग्रेजी आवासीय माध्यामिक विद्यालय विजयी भएको छ।

सिन्धुलीमाढीमा जारी कमलामाई नगरपालिका  स्तरीय अन्तर विद्यालय  क्रिकेट प्रतियोगितामा शनिवार भएको फाइनल खेलमा भगवती आवासीय अङ्ग्रेजी माध्यमिक विद्यालयले जनज्योति माध्यमिक विद्यालय फोस्रेटारलाई १३ रनको फराकिलो अन्तरले हराएर उपाधि हात पारेको हो ।

टस जितेर पहिला ब्याटिङ रोजेको भगवतीले निर्धारित १० ओभरमा ४७ रनको योगफल तयार पारेको थियो ।  भगवतीले दिएको ४८ रनको  विजय लक्ष्य सहित मैदान उत्रिएको जनज्योति माध्यमिक विद्यालय १० ओभरमा सबै विकेट गुमाएर ३३ रनमै समेटियो । फोस्रेटारलाई भगवतीले कुल १३ रनले पराजित गरेर उपाधि चुमेको हो ।

भगवती अङ्ग्रेजी आवासीय माध्यमिक विद्यालयले नगद १२ हजार सहित ट्रफि मेडल र प्रमाणपत्र पाएको छ भने दोस्रो भएको जनज्योति माध्यमिक विद्यालय फोस्रेटारले ६ हजार नगद सहित प्रमाणपत्र प्राप्त गरेको आयोजकले जानकारी दिएको छ ।

भगवती आवासीय माध्यमिक विद्यालयको आयोजनामा बुधवारबाट सञ्चालन भएको क्रिकेट प्रतियोगितामा कमलामाई नगरपालिकाका ८ वटा विद्यालयका क्लबको सहभागिता रहेको छ । ६ वटा निजी विद्यालय र दुई वटा सामुदायिक विद्यालयले प्रतियोगितामा सहभागिता जनाएका थिए । भगवती माध्यमिक विद्यालयको आर्थिक सहयोगमा प्रतियोगिता सञ्चालन भएको हो ।