सिन्धुली ।  मध्यपहाडी राजमार्गको  खुर्कोट-घुर्मी सडक खण्ड तीन दिनदेखि अवरुद्ध भएको छ । निरन्तरको वर्षापछि एक दर्जन बढी स्थानमा पहिरो खस्दा उक्त मार्ग पूर्ण रूपमा अवरुद्ध भएको हो ।

ओखलढुङ्गा, सोलुखुम्बु,खोटाङ, भोजपुर  र उदयपुरको राजधानी काठमाडौँ सँग जोडिने  मुख्य मार्गको रूपमा रहेको मध्यपहाडी राजमार्गको  खुर्कोट-घुर्मी सडक खण्ड पूर्ण रूपमा अवरुद्ध रहेको छ ।

पहिरोका कारण गोलन्जोर गाउँपालिका-६ हैबार अक्कर, बलेली,  कुखुरे टार, काली आँप र कुँडुले, मुर्कीबेसी लगायत ठाउँमा पहिरो खसेको छ भने कतिपय ठाउँ सुनकोशीको बाढीले सडक नै बगाएको छ ।

त्यस्तै फिक्कल गाउँपालिकाको नवलपुर, निगुरेखोला लगायत  विभिन्न दर्जन बढी स्थानमा पहिरो खस्दा राजमार्ग अवरोध भएको छ ।

सडक अवरुद्ध बनेपछि सयौँ यात्रुहरू अलपत्र परेका छन् ।

वर्षा रोकिए पछि स्थानीय तह, सडक विभाग, जनपथ प्रहरी र स्थानीयको सहयोगमा अवरोध पन्छाउने काम भइरहेको प्रमुख जिल्ला अधिकारी लीला प्रसाद शर्माले जानकारी दिए ।