सिन्धुली। सिन्धुलीबाट बिरामी बोकेर गएको एम्बुलेन्स बाढी पहिरोले रोक्दा बिरामीको बाटैमा मृत्यु भएको छ ।

सिन्धुलीको सदरमुकामबाट बिरामी लिएर काठमाडौँ हिँडेको एम्बुलेन्स बिच बाटोमा नै रोकिएपछि दुई जना बिरामीको मृत्यु भएको प्रहरीले जनाएको छ ।

सिन्धुली सदरमुकाम कमलामाई नगरपालिका-४ मल्ल गाउँ घर भई दम रोग समस्या भएको ९३ वर्षकी टिका कुमारी भुजेल र महोत्तरीको बर्दिबास नगरपालिका-८ घर भएका टिवीको बिरामी रहेका ४५ वर्षका मानबहादुर सिंजालीको उपचारका लागि काठमाडौँ तर्फ लैजाँदै गर्दा बाटैमा नै मृत्यु भएको आफन्तले जनाएका छन् ।

सिन्धुलीको सुनकोशी गाउँपालिका १ टुप्पी डाँडामा बिरामी बोकेर काठमाडौँ हिँडेको बा २१२ च ७५२३ र ग१च १७०८  नम्बरको एम्बुलेन्समा रहेका बिरामीको अविरल वर्षासँगै आएको बाढी र पहिरोको कारणले एम्बुलेन्स फसेपछि बाटोमा नै उनीहरूको शुक्रवार नै मृत्यु भएको जिल्ला प्रहरी कार्यालय सिन्धुलीका प्रवक्ता डिएसपी अनिल कुमार खड्काले जानकारी दिए ।

डिएसपी खड्काका अनुसार, बिरामी बोकेर गएको एम्बुलेन्स नेपाल थोक प्रहरी चौकीबाट १ समय मिटर नजिकै फसेको भए पनि रोशीखोला र सुनकोशीमा आएको बाढी पहिरोको कारण उद्धारमा समस्या भएको छ। बिरामीको मृत्यु भएपछि एम्बुलेन्समा रहेको शव नै गन्हाउन थालेको छ।  उनले भने, ‘हामी निरन्तर उद्धारमा लागेका छौ । एम्बुलेन्स बाटो सफा गरेर सिन्धुली फर्काउने तयारीमा थियौँ तर अहिले बिहान खुर्कोट बजार नजिकै कानढुग्री भन्ने स्थानमा बिपी राजमार्ग पुरै भासिएको छ। त्यसैले तत्कालको लागी त्यो सम्भावना पनि टरेको छ ।’

*नोटः यसअघि ९३ बर्ष हुनुपर्नेमा १३ वर्ष भएको सच्याइएको छ ।