सिन्धुली । विशेषज्ञ सेवासहितको बृहत् एकीकृत स्वास्थ्य शिविर सञ्चालन हुने भएको छ।

संघीय मामिला तथा सामान्य प्रशासन मन्त्रालय, निजामती कर्मचारी अस्पताल काठमाडौँ र स्वास्थ्य तथा जनसङ्ख्या मन्त्रालयको सहयोगमा गोलन्जोर गाउँपालिकाको व्यवस्थापन र नेपाल निजामती कर्मचारी संगठन केन्द्रीय कार्यसमितिको समन्वयमा शिविर सञ्चालन हुने भएपछि सिन्धुली सहित रामेछाप र ओखलढुंगा जिल्लाका सेवाग्राहीले समेत सेवा उपभोग गर्न पाउनेछन्।

सिन्धुलीको गोलन्जोर गाउँपालिका-३ ग्वाल्टारमा भदौ २८ र २९ गते सञ्चालन हुने शिविरमा विशेष गरी विशेषज्ञ चिकित्सकद्वारा हाडजोर्नी तथा नशा रोग, जनरल मेडिसिन, स्त्री तथा प्रसूति रोग, छाला रोग, जनरल सर्जरी, मनोरोग सेवा, बाल रोग, फेमिली मेडिसिन, फिजियोथेरापी र इ.सी.जी. सेवा प्रदान गरिने गोलन्जोर गाउँपालिकाका अध्यक्ष शंकर राज बरालले जानकारी दिए ।

त्यसैगरी भिडियो एक्स-रे, औषधी वितरण (फार्मेसी सेवा), रगत परीक्षण (ल्याब सेवा) साधारण शल्यक्रिया सेवा धेरै रोगहरूको उपचार हुनेछ।

गाउँपालिकाका स्वास्थ्यकर्मीले समेत शिविरमा सघाउनेछन्। शिविर सञ्चालन हुने मितिमा बिहान ८ बजेबाट ४ बजेसम्म सञ्चालन हुनेछ। शिविर पूर्ण रूपमा निःशुल्क हुनेछ।