रामेछाप । रामेछापको दोरम्बा शैलुङ गाउँपालिका–३ टोकरपुरको लेखर्कमा गएर राति आएको पहिरोमा परि ज्यान गुमाउनेको सङ्ख्या ६ पुगेको छ । पहिरोमा पुरिएका चारजना अझै बेपत्ता छन् ।

पहिरोमा परी ३२ वर्षकी चण्डिका थापा मगर र उहाँका १८ महिनाका छोरा आमुस श्रेष्ठको ज्यान गएको छ । चण्डिकासँगै सो घरमा पुरिएकी अञ्जना पहरीको भने जीवितै उद्धार गरिएको छ ।

पहिरोले घर बगाउँदा पुरिएका ४५ वर्षीय उर्मिला पहरी, १५ वर्षका सन्तोष पहरी, १६ वर्षका विज्ञान पहरी, १५ वर्षका सन्दीप पहरीको शव पनि निकालिएको उद्धारमा संलग्न स्थानीय राजुराम पाठकले जानकारी दिए ।

पहिराले घर बगाउँदा ९० वर्षकी पुड्की पहरी, करिब ५५ वर्षका काले पहरी, ५० वर्षकी झ्याउँकिरी पहरी र २० वर्षकी विनीता पहरी बेपत्ता छन् ।

पहिरोले स्थानीयका चारवटा घर बगाएको छ भने पहिरोको कारण पुरै बस्ती जोखिममा छ । गाउँको माथिबाट ठाउँ ठाउँमा पहिरो गएको छ ।

पहिरोले स्थानीयका चारवटा भैँसी, तीनवटा गाई, २९ वटा बाख्रा लगायतका पशु बस्तु तथा धनमाल समेत बगाएको छ । बाढीले स्थानीय ढोइगाउँ खोलामा रहेको पक्की पुल बगाएको छ । त्यस्तै घट्टे खोलाको पुलमा पनि क्षति पुर्‍याएको छ ।