सिन्धुलीमाढी। रजनिश शाह आत्महत्या घटनाको छानबिनको माग गर्दै  विद्यार्थीहरूले सिन्धुलीमा प्रदर्शन गरेका छन् ।

सिन्धुलीको भगवती आवासीय अङ्ग्रेजी माध्यामिक विद्यालयमा अध्ययनरत विद्यार्थी रजनिश शाहले गत आइतबार विद्यालयको होस्टेलमा आत्महत्याको प्रयास गरेका थिए । विद्यालयले उनलाई उद्धार गरेर उपचारको लागि काभ्रेको धुलिखेल अस्पताल पुर्‍याएको थियो । धुलिखेल अस्पतालमा सघन उपचार कक्षमा उपचाररत शाहको शुक्रवार बिहान निधन भएको थियो ।

सोही विषयलाई लिएर  विद्यार्थीहरूले शनिवार सिन्धुलीमाढीमा मुखमा कालो पट्टी बाँधेर साङ्केतिक विरोध जनाउँदै प्रदर्शन गरेका हुन् ।  विद्यार्थीहरूले घटनाको विषयमा राजनीतिक दल, नागरिक समाज र पत्रकार समेत नबोलेको भन्दै सत्य तथ्य छानबिनको माग गरेका थिए ।

त्यसैगरी विद्यालयले कक्षा- ८ मा अध्ययनरत छात्रावासमा बस्दै आएका धनुषाको लक्ष्मीनिया नगरपालिका-४ का रजनिश शाहले आत्महत्याको प्रयास गरेको र उनको उपचारको क्रममा धुलिखेल अस्पतालमा निधन भएकोले विद्यालय परिवार मर्माहत भएको जनाएको छ । साथै विद्यालयले उनको निधनमा आइतबार शोक बिदा दिएको छ ।