सिन्धुलीमाढी। विपन्न वर्गका किसानहरुको आयआर्जनमा सहयोग गर्ने उद्देश्यले सिन्धुलीको कमलामाई नगरपालिका वडा ५ ले निशुल्क बाख्रा वितरण गरेको छ ।
कमलामाई नगरपालिका–५ का विभिन्न समुदायका अति विपन्न तथा एकल महिलाहरुलाई आज विहीबार उन्नत जातको बाख्रा (पाठी) वितरण गरिएको हो । आर्थिक वर्ष २०८०-०८१ मा विपन्न एकल महिला आय आर्जन तथा महिला आयआर्जन शिर्षकमा विनियोजित बजेटबाट २२ जना किसानलाई क्रस जातको बाख्रा वितरण गरिएको वडा कार्यालयले जानकारी दिएको छ ।
यसका लागि वडाकार्यालयले रु १/१ लाख खर्च गरेको छ । निशुल्क वितरण गरिएको बाख्राबाट किसानको जीवनस्तर माथि उठाउन टेवा पुग्ने विश्वास व्यक्त गर्दै वडाअध्यक्ष पुर्ण बहादुर खड्काले बाख्रापालन बाट राम्रो आयआर्जन गरी अरुका अघि उदाहरणीय बन्न किसानलाई आग्रह गरे ।
बाख्रा हस्तान्तरण गर्दै खड्काले, “निशुल्क पाएको बाख्राको स्याहारसुसार र हेरचाह गरी यसबाट वर्षेनि राम्रो आम्दानी गर्नुहुनेछ भन्ने विश्वास लिएको छु ।” वडा नम्बर ५ का विभिन्न टोलहरु बाख्रापालनका लागि उपयुक्त वातावरण भएको वडा रहेको बताउँदै उहाँले व्यावसायिकरुपमा बाख्रापालन व्यवसाय अघि बढाउन आवश्यक रहेको जनाए ।
वडा कार्यालयले निःशुल्क उपलब्ध गराएको बाख्रा कम्तीमा दुई वर्षसम्म आफ्नो घरमा पालेको हुनुपर्ने सर्त राखिएको छ । समय–समयमा हुने अनुगमनका क्रममा घरमा बाख्रा नपालेको पाइएमा वडा कार्यालयले कारवाही समेत गर्ने जानकारी दिए । वडा कार्यालयले उन्नत जातको बाख्रा निःशुल्क वितरण गरेपछि लाभग्राही महिला हर्षित भएका छन्